Die MPO-direksie sê in ’n verklaring die bedryfsproses om hom “te herkalibreer tot sy toegespitste funksies en tot voordeel van sy lede” het in Mei begin en is vroeg in Oktober afgehandel.
“Van die huidige posisies in die MPO het oorbodig geraak en is dus afgeskaf. Die personeel van die instituut vir suiweltegnologie en regulatoriese en lededienste is geraak,” luidens die verklaring.
Mnr. Fanie Ferreira, waarnemende uitvoerende hoof, sê sulke veranderinge is nie maklik nie “en ons erken dat dit ’n persoonlike impak het op mense wat toegewyd was aan die missie van die MPO. Ons bedank in besonder vir (me.) Barbara Bieldt en (mnr.) Philip Swart vir hul bydraes tot die MPO se prestasies.
“Hoewel uiters moeilik, was hierdie veranderinge noodsaaklik om die organisasie in staat te stel om ’n lewensvatbare langtermynprestasie te lewer, wat steun verleen aan ons vermoë om volhoubare melkboerdery te ondersteun en uit te bou.”
Die organisasie hoop om teen einde vanjaar ’n nuwe uitvoerende hoof aan te stel.
As deel van die herstruktureringsproses is ’n aftreebeleid, wat bepaal dat die normale pensioenouderdom vir alle werknemers 65 jaar is, in Julie ingestel.
Agri Connect, The Dairy Mail en Agri Inspec, wat maatskappye binne die MPO-groep was, het van eienaar verander, maar bly op kontrakgrondslag ’n integrerende deel van die MPO se diensaanbod.
‘VAARTBELYN’
Mnr. Colin Wellbeloved, voorsitter van die MPO-direksie, beskryf die veranderinge by die organisasie soos volg: “Deur ons bedryf meer vaartbelyn te maak, skep ons ’n leniger organisasie met groter finansiële buigsaamheid, wat sterk konsentreer op kernfunksies.
“Ons bied ook ’n platform vir koper-verkoper-onderhandelinge met die voorsiening van markinligting, en verleen terselfdertyd hefboomkrag aan ons leierskap, terwyl ons op gedissiplineerde wyse sakeontwikkeling nastreef om die mark uit te brei.”
Die MPO sê sy direksie het tydens die moeilike proses ondersteuning ontvang en hy het melkboere bedank vir hul vertroue in die direksie.
