Muggieplae het die Noord-Kaap beetgepak en boere lei reuse-verliese ten opsigte van vee, sê Agri Noord-Kaap.
Mnr. Johan van Rensburg, uitvoerende hoof, sê boere verloor tientalle lammers en die kondisie van ramme en ooie neem af omdat die muggies die diere byt. “Van die boere is al desperaat om van die muggies ontslae te probeer raak.”
Die departement van landbou, bosbou en visserye is verantwoordelikheid vir migrerende plaagbeheer, wat muggies, sprinkane en rooibekvinke insluit. Van Rensburg sê die traagheid van die departement om tydig teen plae op te tree, veroorsaak enorme frustrasie onder die boere.
Geen gif gespuit
Volgens Van Rensburg kan dié uitbreking grootliks toegeskryf word aan die feit dat die staat vir die afgelope jaar glad nie gif langs die Oranjerivier af gespuit het nie. Die staat se helikopter, wat gewoonlik hiervoor gebruik word, het glo die geskeduleerde dienstydperk bereik. Die herstelwerk moet teen hoë koste uitgevoer word, en die departement het glo besluit om nie die helikopter te herstel nie, maar die diens op ‘n tenderbasis uit te kontrakteer.
“Ons het nou van uit verskeie oorde erge druk op die staat toegepas en ons hoop dit gaan vinnig die gewenste gevolge hê. Maar ek gaan niks glo voor ek nie daardie helikopter sien nie,” sê hy.
Gaan nie vrek nie
Die spuit-tydperk om die uitbroei van larwes in die lente te beperk, is egter reeds in Julie. Van Rensburg sê sou die departement dus binnekort spuit, gaan dit nie noodwendig beteken dat die muggies wat diere tans lasting val, sal vrek nie. “Dit sal wel beslis dié muggies wat nog nie die sesde stadium van die larwe bereik het nie, laat vrek.”
Die muggies kom tans van Douglas af voor, al teen die rivier af, tot by die see. “Afhangende van hoe die wind waai, kan die muggies tot sover as 120km land-in langs die rivier voorkom.”
Kommer oor plukseisoen
Mnr. Jors van der Westhuizen, ‘n boer van die Grootdrink-omgewing, sê in dié distrik het die muggies nog nie tot veevrektes gelei nie.
“Ons kommer is wel vir die vrugte-oes seisoen. As die muggies nie betyds onder beheer gebring gaan word nie, gaan dit ook ‘n uitwerking op arbeiders se werk hê, want niemand kan werk as ‘n spul muggies jou die hele tyd takel nie,” aldus Van der Westhuizen.
14 September 2011
