Dr. Pieter Mulder, die leier van die Vryheidsfront Plus en die adjunk-minister van Landbou, Bosbou en Visserye, het Maandagoggend die hofverskyning van ses verdagtes, wat verdink word van die moorde van ‘n boer, sy vrou en ‘n drie jarige dogtertjie, in Lindley bygewoon.
Luidens ‘n verklaring het Mulder homself sterk teenoor plaasmoorde uitgespreek en gesê: “Die ANC-regering moet wakker skrik en plaasmoorde as ‘n prioriteitsmisdaad verklaar. Dit is baie belangrik dat die ANC-leiers hierdie tipe gewelddadige moorde in die openbaar deurlopend moet veroordeel.”
Sowat 200 lede van dié part,y asook lede van AfriForum Jeug, het tydens die verhoor voor die hof saamgetrek om hulle protes teen die apatiese houding van die Regering teenoor plaasmoorde te beklemtoon.
Klimaat wat tot wrede moorde lei
Volgens Mulder skep onverantwoordelike propaganda-stellings ‘n klimaat wat tot wrede moorde lei.
“Hierdie moorde is grusaam en bevat ‘n sterk element van rassisme. ANC-leiers sing liedjies wat woorde, soos ‘Skiet die Boer’ bevat en dit skep ‘n atmosfeer van rassisme waarbinne hierdie moorde dan plaasvind,” aldus Mulder.
Sers. Majang Mosupa sê die saak is tot 13 Desember 2010 uitgestel. Die verdagtes, wat tussen die ouderdomme van 16 en 24 is, sal dan kans kry om vir borgtog aansoek te doen. Intussen sê kol. Motantsi Makhele die ondersoek na die saak gaan voort.
Die 40 jarige Attie Potgieter, sy 36 jarige vrou Wilna en hulle drie jarige dogter, Willemien, is vermoedelik verlede Woensdagaand (1 Desember 2010) op die plaas Tweefontein wreedaardig vermoor.
6 Desember 2010
