Die posisie van dr. Pieter Mulder as adjunk-minister van Landbou, Bosbou en Visserye is nie tydens sy besoek aan pres. Jacob Zuma bespreek nie.
“My posisie en of ek gaan aanbly was nooit ter sprake nie,” vertel Mulder. Dit volg ná mediaberigte dat Mulder se posisie, en of hy sou aanbly, Woensdag, 3 November, met Zuma bespreek is.
“Die enigste wat oor my posisie wat bespreek is, is my standpunte. Ek het dit duidelik gestel dat ek nie gaan koöpteer op my standpunte sodat dit noodwendig met die Regering ooreenstem nie, want ek is steeds ook die leier van ‘n opposisieparty,” vertel Mulder.
Temas wat bespreek is
Volgens Mulder het hy sy kommer oor mediavryheid, swak dienslewering deur munisipaliteite en die agteruitgang van Afrikaanse onderwys tot op universiteitsvlak duidelik gestel.
Mulder sê verskeie metodes kan gebruik word om opposisiepartye en sy kiesers se belange onder die Regering en die Parlement se aandag te bring. “Die beste metode om kiesers se probleme onder die aandag van die regering te bring, bly egter persoonlike gesprekke met die betrokkenes. Die adjunkministerskap bied geleentheid vir sulke gesprekke.”
Goeie gesprek
“Ek voel goed oor die gesprek, want die President se begrip vir kwessies wat die Afrikaner raak, begin deurskemer,” sê Mulder. “Waar ek aanvanklik nie baie begrip kon optel nie, begin dit nou deurkom en pres. Zuma het ook sy waardering vir die betrokkenheid van die Afrikaner uitgespreek.”.
Volgens Mulder het Zuma aangedui dat die verskeie kwessies wat bespreek is, met die betrokke Ministers en regeringsamptenare opgevolg gaan word.
4 November 2010
