Suid-Afrika het ‘n behoefte aan ‘n sterker National African Farmers’ Union (Nafu) “wat dinge anders en slim doen”, sê me. Tina Joemat-Pettersson, Minister van Landbou, Bosbou en Visserye.
Sy het honderde opkomende boere gedurende dié organisasie se kongres by die Universiteit van die Vrystaat in Bloemfontein toegespreek. Die byeenkoms duur tot Vrydag (3 Desember) en volg op 52 konsultatiewe vergaderings met opkomende boere in die land se munisipale distrikte.
Dit was tydens dié vergaderings waar dit duidelik geword het dat Nafu homself moet omskep in ‘n meer doeltreffende verteenwoordiger van sy lede.
Luidens ‘n berig op Fin24.com word sowat 1 500 opkomende boere van regoor Suid-Afrika by die kongres verwag, wat die toekoms van Nafu sal bepaal. Joemat-Pettersson het ‘n beroep vir eenheid onder lede van die organisasie gedoen.
“Daar is net een Nafu wat alle bestaans- en kleinskaalse boere in die land moet saambring. Die tyd vir beplanning is verby en die tyd vir kla is verby. Ons het ‘n goeie begrip van ons probleme en ons benodig oplossings en antwoorde.”
Sy sê haar departement staan gereed om met klein en opkomende boere te werk en het ook die samewerking van wit boere wat wil help. Die Regering fokus tans op die verbetering van toegang tot finansiering, markte en vaardighede om opkomende boere by te staan met werkskepping en toegang tot die landbouverwerkingsbedryf.
‘n Nuwe grondwet, struktuur en vyf-punt strategiese plan om ‘n ommekeer by die organisasie te bewerkstellig, is ook bespreek.
Bron:
2 Desember 2010
