Namibië se kleinveeskema waarvolgens boere net een skaap of bok mag uitvoer vir elkeen wat plaaslik geslag word, word voortgesit totdat ’n langtermyn bemarkingstrategie ontwikkel is wat waardetoevoeging in die hele waardeketting verseker.
Mnr. Calle Schlettwein, minister van handel en nywerheid, het op ’n konferensie van die Namibiese Landbou-unie in Windhoek gesê dit is om die afhanklikheid van uitvoer na Suid-Afrika te verminder. Daardeur sal boere minder aan ontwrigtings onderworpe wees, soos toe Suid-Afrika sy veterinêre invoervereistes skerp verhoog en invoer vanuit Namibië feitlik tot stilstand gedwing het. Hoewel die vereistes later verlig is, is daar sprake dat dit weer verskerp kan word.
Hy het op die vooruitskouingskonferensies gesê baie min lande kon sover tot ’n nywerheidsland ontwikkel sonder ’n bydrae deur die landbousektor. Daarom is hy bekommerd dat die Namibiese landbousektor se bydrae tot die land se ekonomie krimp.
Hy het gesê in die verlede was die klem meer op primêre produksie as waardetoevoeging. Hopelik sal beleggings in waardetoevoeging van voedsel toeneem sodat die land meer landbouprodukte waarby waarde toegevoeg is, kan uitvoer.
“Mense dink dikwels boere kan net by die eerste fase van die waardeketting betrokke wees en dat hul verantwoordelikheid by die plaashek eindig. Daar is egter groot potensiaal vir die verwerking van produkte op die plaas,” het hy gesê. Dit sal aansluit by Namibië se Visie 2030-projek vir die ontwikkeling van nywerhede om maksimum waarde toe te voeg voordat produkte uitgevoer word.
