Die wetsontwerp op die nasionale minimum loon, wat ’n basiese loon van R20 per uur voorstel (niemand in Suid-Afrika mag minder as dit verdien nie), asook die Wysigingswet op Arbeidsverhoudinge en die Wet op Basiese Diensvoorwaardes sal nou voor die Nasionale Raad van Provinsies dien.
Gemengde reaksie
Die DA het teen hierdie wetsontwerpe gestem en aangevoer daar is nie behoorlike openbare verhore gehou nie en dat die wetgewing kan meebring dat duisende mense hul werk verloor.
Die kantoor van die ANC se hoofsweep het egter aangedui dat die aanvaarding van hierdie geskiedkundige wetgewing vir ’n minimum loon sal help om die miljoene kwesbare werkers te beskerm wat veel minder as R20 per uur verdien.
Die nasionale minimum loon sal ’n beter inkomste vir sowat 75% van alle werkers in die landbou beteken wat minder as R2 000 per maand verdien. Dit geld ook 90% van huiswerkers wat minder as R3 120 per maand verdien, sê mnr. Jackson Mthembu, hoofsweep van die ANC in die Parlement. “Dit verteenwoordig beduidende vordering om te verseker dat werkers teen ‘slaaflone’ beskerm word.”
Adv. Anton Alberts, die VF Plus se woordvoerder vir arbeid, meen hoewel die minimum loon edel mag klink, sal dit die probleem van ongelykheid eerder vererger as verbeter. “Daar sal dringend na maniere gesoek moet word om die ekonomie te laat groei om te sorg vir werkloses wie se getalle ongetwyfeld aangevul sal word weens ’n minimum loon.”
Boere bystaan
Agri SA het weer eens die versekering gegee dat hy die leiding sal neem in verband met dié kwessie. Die organisasie raai ook belanghebbendes aan om waaksaam te wees oor die impak wat die nasionale minimum loon op finansieel kwesbare boerdery-ondernemings sal hê.
Mnr. Neil Hamman, voorsitter van Agri SA se arbeid- en ontwikkelingsentrum vir uitnemendheid, sê die landbousektor is baie ingewikkeld, veral as ’n mens in ag neem dat die meerderheid boerdery-eenhede as klein tot mediumgroot ondernemings (SME’s) beskou kan word. Baie van hulle teken reeds verliese aan weens ’n kombinasie van droogtetoestande en lae internasionale kommoditeitspryse.
Die loon is egter ’n stap in die rigting van sekerheid. “Ons is dankbaar dat ons sektorale vasstelling steeds in plek is en verwelkom die aanstelling van die nasionale kommissie oor die minimum loon wat in die toekoms verantwoordelik sal wees vir die vasstelling van die nasionale minimum loon.”
Die implementeringsdatum van die minimum loon moet nog bepaal word.
