Luidens ’n verklaring deur CropLife SA, wie se noodlyn oorval is met oproepe oor die landwye voorkoms van Duitse kakkerlakke, is die uitbreking nie net weens die klimaat nie, maar ook onhigiëniese omstandighede. Die massiewe uitbreking het volgens CropLife SA gelei tot die grootskaalse onwettige gebruik van insekdoders wat nie geregistreer is vir binnenshuise gebruik nie.
Kakkerlakbestryding begin volgens CropLife SA met ’n ernstige poging om wonings op te ruim deur rommel en oorskietkos te verwyder. “ ’n Vuil kombuis vol oorskietkos en troeteldierkos wat vrylik beskikbaar is, moet opgeruim word om te voorkom dat hierdie goggas jou huis binneval.
“Vloere, moontlike broei- en wegkruipplekke in kombuise, spense en badkamers moet deeglik gewas en ontsmet word met ’n verdunde oplossing van huishoudelike bleikmiddel. Plekke waar kakkerlakke kan wegkruip, is onder meer yskaste en wasmasjiene, dreine en toe, donker plekke soos motorhuise.”
Kakkerlakke hou van die hitte en vog onder elektriese toetstelle en daarom broei hulle gereeld onder dié toestelle.
CropLife SA maan die publiek om slegs geregistreerde insekdoders te gebruik en te hou by die aanwysings op die produkte se etikette om gesondheidsrisiko’s te vermy. Insekdoders sonder etikette moet nie op sosiale media of op straat gekoop word nie aangesien dié produkte waarskynlik gevaarlik sal wees as dit binnenshuis gebruik word.
Berokingsmiddels in die vorm van spuitblikkies of berokingstablette kan kakkerlakke doeltreffend bestry, maar die veiligheidsaanwysings moet gevolg word.
Indien die hulp van ’n kontrakteur ingeroep word, moet daar aangedring word op ’n bewys van sy registrasie as ’n plaagbestrydingskontrakteur. Bevestig ook of die produkte wat hy gebruik, binnenshuis gebruik kan word. Insekdoders moet nooit aangewend word terwyl daar mense of troeteldiere in die huis is nie.
Volgens CropLife SA is kakkerlakaas ook baie doeltreffend en nie gevaarlik vir mense of troeteldiere nie. Die aas, wat in die vorm van aasstasies of spuite beskikbaar is, moet geplaas word waar kakkerlakke waarskynlik snags aktief sal wees.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
