'n Nuwe projek om peste en siektes by boomlusern te ondersoek, word eersdaags in die vooruitsig gestel.
Een van die kritieke gapings in die vestiging van boomlusern in Suid-Afrika is navorsing, meen die organisasie, Boomlusern-Netwerk. Die organisasie meen dat die algehele gebrek aan akademies-gesteunde navorsing dié bedryf se integriteit beskadig het, en het besluit om die situasie te verander.
Vervolgens is 'n vergadering met 'n aantal rolspelers by die Instituut vir Bosbou en Landboubiotegnologie (FABI) van die Universiteit van Pretoria belê. Uit die vergadering het die instituut se prof. Jolanda le Roux die eerste navorsingsvoorstel ingedien wat op M-vlak geïnisieer sal word.
Die navorsing sal fokus op fungi, peste en plae by boomlusern in Suid-Afrika. Le Roux meen die projek kan die Boomlusern-Netwerk help om 'n toekomstige strategie neer te lê vir verlaging van die pes- en siekte-impak op die industrie, om daardeur te verseker dat die bedryf in Suid-Afrika volhoubaar ontwikkel.
Die inhoud van die voorgestelde projek sluit die identifikasie van pes- en gesondheidsprobleme van boomlusern in kwekerye in Suid-Afrika in, asook die identifikasie van pes- en gesondheidsprobleme van boomlusern op plase in Suid-Afrika.
Die projek sal ook die identifikasie van boomlusern Rhizobia in Suid-Afrika ondersoek en studies onderneem om vas te stel wat die rol daarvan is in die oorlewing en groei van boomlusern. Hieruit sal die projek ook die noodsaaklikheid, al dan nie, van die enting van plante met Rhizobia vir die beste groei ondersoek.
Sluit aan by die Boomlusern-Netwerk
