Die enigste soet is die besluit van mnr. Enoch Godongwana om miljarde toe te ken vir die herstel van KwaZulu-Natal se vloedskade aan vervoerinfrastruktuur. Baie van dié provinsie se suikerrietkwekers het deurgeloop onder die vloede van April vanjaar.
Die vereniging se uitvoerende hoof, dr. Thomas Funke, het gesê hy is teleurgesteld dat Godongwana versuim het om enige aanduiding te gee oor die toekoms van die omstrede suikerbelasting. “Dit is ’n bestaanskwessie vir Suid-Afrika se suikerrietverbouingsbedryf en breër suikerwaardeketting... Die werksonderdrukkende suikerbelasting gaan voort om die suikerbedryf se groei en bydrae tot Suid-Afrika se ekonomie te smoor.”
Hy het weer verwys na statistieke deur die nasionale ekonomiese ontwikkelings- en arbeidsraad (Nedlac) dat in die eerste jaar ná sy ontstaan in April 2018, die regering se belasting op suikerversoete drankies die suikerbedryf meer as 16 000 werkgeleenthede gekos het. Meer onlangse statistieke deur die drankvereniging van Suid-Afrika dui daarop dat werkverliese weens die suikerbelasting nou sowat 25 000 kan wees.
Die buro vir voedsel- en landboubeleid (BFAP) wys in sy jongste navorsing dat indien die belasting op sy huidige vlak gehandhaaf word, Suid-Afrika oor die volgende tien jaar bykans nóg 16 000 werkgeleenthede sal kwyt wees, en die suikerrietaanplantings kan met 46 000 ha verminder.
“Erger nog, gegrond op die begrotingstoespraak in Februarie vanjaar, blyk dit dat die belasting verhoog kan word, die drempel vir die belasbare suikerinhoud van drankies kan verder verlaag word, en dit kan na vrugtesappe uitbrei. Dit is hoofsaaklik kleinskaalse suikerrietkwekers en landelike gemeenskappe wat die swaarste getref sal word.” Die vereniging het reeds gesprekke met die presidensie en tesourie aangevoor oor die negatiewe impak van die “verwoestende” suikerbelasting. “En ons sal hierdie pogings voortsit, veral in die lig van die minister se voornemens om die vernietigende belasting te verhoog.”
Funke sê die suikerbedryf kan maar net hoop dat Godongwana se versuim om na die suikerbelasting in sy begrotingsrede te verwys ’n aanduiding is dat die voorgestelde verhoging nie in klip gegiet is nie, en dat die regering uiteindelik sal instem tot die bedryf se versoeke om die “vernietigende suikerbelasting” heeltemal te laat skrap.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
