Met ‘n tweede sarsie vloedwater wat tans deur die Noord-Kaap spoel, het ‘n haelstorm die gemeenskap van Groblershoop getref.
Mnr. Wilco Fourie, ‘n boer van die distrik, sê dit is die eerste keer wat hy ‘n haelstorm beleef het wat vir 15 minute lank aangehou het. Kyk hier na foto's van die skade.
“Vir die eerste twee minute was die korrels albastergrootte. Toe raak dit stil vir ‘n minuut of twee, maar daarna het hael soos groot soos golfballe vir 13 minute lank geval”, vertel Fourie.
Wyd voorgekom
Fourie sê die hael het in ‘n strook van sowat 70km van die Boegoebergdistrik af geval, hoewel die stormwinde nie oral ewe sterk was nie en die haelkorrels net sporadies so groot was.
‘n Buurman van Fourie se katoenaanplanting is alles platgeslaan, en hy het tussen 20% en 70% skade aan sy wingerde. Hy sê hulle is gelukkig dat hulle landerye en wingerde nie deur die rivier oorspoel is nie, maar weens die baie reëns staan die water plek-plek in die lande.
Vloed duur voort
Intussen stu die tweede front vloedwater na die Benede-Oranje-distrik voort. Mnr. Johan van Rensburg, die uitvoerende hoof van Agri Noord-Kaap, sê die Oranjerivier vloei tans teen 5000 kubieke meter water per sekonde (kumek), en na verwagting sal dit ‘n piek van 7,3m onder die brug op Upington bereik.
“Groot skades is nog nie aangemeld nie, maar verskeie laagwaterbrûe is weer oorstroom, en die piek van dié water word tot en met Vrydag verwag. Die manne is maar bekommerd, want dieselfde hoeveelheid water kan – veral sonder noodwalle – ‘n ander invloed op landerye, ens. hê”, aldus Van Rensburg.
Volgens Van Rensburg vloei 1400 kumek tans uit die Bloemhofdam en sowat 3000 kumek uit die Vanderkloofdam. Intussen sê mnr. Jors van der Westhuizen, ‘n boer van die Grootdrinkdistrik, dit is duidelik dat dié water klaar skade aangerig het.
“Die noodwalle het op baie plekke weggespoel, en nog skade is hieraan aangerig. Met die noodwalle weg, en van die grond nog nat, spoel daar nou groot gate in die landerye en so aan”.
Hy sê hulle is wel bly dat die water dié slag sowat 40cm laer is as met die aanvanklike vloed, en dit blyk of die water reeds effe begin terugsak.
2 Februarie 2011
