Die Minister van Landelike Ontwikkeling en Grondhervorming, mnr. Gugile Nkwinti, het gister erken dat grondhervorming misluk as nuwe plaaseienaars hul grond verlaat en weer in townships gaan bly, aldus Volksblad.
Nkwinti het gister op ’n mediakonferensie buite Pretoria gepraat na afloop van ’n restitusie-werksessie waar meer as 1 200 afgevaardigdes betrokke was.
Verskeie tekortkominge van die restitusie-program is in dié werksessie uitgelig.
Dit sluit in die afhandeling van eise sonder die versekering van deeltitelaktes vir die begunstigdes en beweerde korrupsie en die onbevoegdheid van amptenare in die department.
Nkwinti sê 90% van die plase wat in die 2009/2010-boekjaar oorgedra is, vaar nie goed nie. Hy het ook gesê ’n groot doelwit is dat grondoordrag met ontwikkeling gepaard moet gaan.
Ondanks sommige uitlatings van mnr. Julius Malema, ANC-jeugleier, waauit dit blyk dat Malema meen grond moet sonder vergoeding onteien word, sê Nkwinti grondhervorming moet binne Suid-Afrika se grondwetlike raamwerk plaasvind.
Die Regering beoog om 30% van grond teen 2014 oor te dra. Boere sal vir hul grond vergoed word.
Bron: Volksblad
9 Mei 2011
