Met gerugte van skuiwe binne die Kabinet wat die rondte doen, meen ‘n kenner me. Tina Joemat-Pettersson, Minister van Landbou, Bosbou en Visserye, asook mnr. Gugile Nkwinti, Minister van Grondhervorming en Landelike Ontwikkeling, sal moontlik nie geskuif word nie.
Prof. André Duvenhage, politieke ontleder en dosent aan die Universiteit van Noordwes se Potchefstroom-kampus, sê bitter min inligting het nog in die media verskyn rondom moontlike skuiwe wat dié ministers betref.
Twee moontlike opsies vir verandering
Duvenhage sê weens die munisipale verkiesings wat volgende jaar plaasvind sal die Regering sekere stappe neem om sy huis in orde te kry, en twee opsies word gewoonlik oorweeg.
Die eerste is die teken van diensooreenkomste, soos wat baie ministers en hul adjunkte tans onderteken, en ‘n tweede opsie is herposisionering binne die Kabinet. Hiermee sal die Regering ‘n denkpatroon volg om die resolusies en besluite van die ANC se algemene vergadering in Polokwane in 2008, toe te pas.
Politieke verbintenisse
Volgens Duvenhage sal veral Nkwinti nie deur sulke stappe geraak word nie weens sy politieke verbintenisse.
“Minister Nkwinti beweeg polities links en artikuleer die breër aanvaarde beleidsriglyne. Enige iets is egter moontlik, maar ek dink dis meer onwaarskynlik as waarskynlik,” vertel hy.
Moontlike skuiwe?
Verskeie skuiwe word verwag, en ‘n klomp name is al in dié verband genoem, sê Duvenhage. Dié name sluit in:
Me. Bulyewa Sonjica, Minister van Waterwese en Omgewingsake
Me. Susan Shabangu, Minister van Mynwese
Mnr. Siyabonga Cwele, Minister van Staatsveiligheid
Me. Nosiviwe Maphisa-Nqakula, Minister van Korrektiewe Dienste.
Mnr. Blade Nzimande, Minister van Hoër Onderwys
Me. Lulu Xingwana, Minister van Kuns en Kultuur
Me. Noluthando Mayende-Sibiya, Minister vir Vroue, Kinders en Persone met Gestremdhede.
25 Oktober 2010
