Nog 40 helikopters is by die stryd teen renosterstropery bygevoeg na ‘n verwarrende insident by Hammanskraal.
Mnr. Andre Snyman, die stigter van die eBlockwatchgroep, sê die National Airline Cooperation (NAC) het Woensdag (2 Februarie), hulle gewig by die organisasie se Rhino Dream Team gegooi.
Verdagte helikopter
Snyman sê van die lede van die Dream Team het hom Dinsdagmiddag (1 Februarie) laat in kennis gestel van ‘n helikopter wat laag oor ‘n wildsplaas met renosters in die Hammanskraal-distrik gevlieg het.
Die helikopter het so laag en stadig gevlieg dat ‘n foto daarvan geneem kon word. Snyman sê hy het sy netwerk van kontakte in kennis gestel sowel as die Pilots Against Rhino Poaching (PARP), in ‘n poging om die moontlike stropers te stop.
Nog 40 helikopters
Die betrokke vlieënier van die NAC het Snyman Woensdagoggend gekontak en gesê: “Dit was ek, ek is nie ‘n stroper nie, moenie skiet nie”.
Volgens Snyman het die vlieënier, wat ‘n permit het om oor ‘n naburige plaas te vlieg, verdwaal en oor die verkeerde plaas gevlieg.
“Die man het egter gesê hulle is moeg vir die slegte naam wat helikoptervlieëniers weens stropery gekry het, en hulle wil by die stryd betrokke raak. Hulle het 40 helikopters wat landwyd vlieg, en hy het die dienste van dié helikopters aan die span belowe”.
Intussen sê Sanparke 19 renosters is al die jaar in Suid-Afrika doodgemaak.
2 Februarie 2011
