Nog geen besluit of terugvoer is van me. Tina Joemat-Pettersson, Minister van Landbou, Bosbou en Visserye, ontvang oor die toekoms van dr. Andile Dyasi, uitvoerende hoof van Onderstepoort Biologiese Produkte (OBP), nie, sê dié instansie.
Adv. Dave Mitchell, nie-uitvoerende direkteur van die OBP-raad, sê die minister het nog geen woord gerep nie, hoewel sy ‘n besluit teen 26 Oktober moes bekend maak. Landbou.com het vroeër berig dat die Parlementêre oorsigkomitee vir Landbou, Bosbou en Visserye ‘n voorlegging aan Joemat-Pettersson gestuur het waarvolgens sy die besluit teen dié datum bekend moes maak.
Die voorlegging het gevolg na ‘n vergadering met die OBP-raad, opposisiepartye en ander rolspelers. Die minister moes teen dié datum besluit of Dyasi afgedank gaan word, óf sy moes verduidelik waarom dit nie gedoen kan word nie.
Portefeuljekomitee vergader
Volgens Mitchell vind die portefeuljekomitee se volgende gereelde vergadering na verwagting op Dinsdag, 9 November, plaas. Hy sê daar is nie sekerheid of die komitee die kwessie dan weer sal bespreek nie, maar die vergaderings word gereeld gehou om terugvoer te kry oor die verskeie vrae wat aan die departement gestel word.
“Wat ons verder kan oorweeg is om in gereelde kontak met die portefeuljekomitee te bly en om ons na die Nasionale Tesourie te wend met die saak,” verduidelik Mitchell.
Verskeie aanklagte teen Dyasi
Die komitee en die verskeie partye betrokke by die vorige vergadering het glo hul ontevredenheid met Dyasi duidelik gemaak. Hy is verlede maand, na ‘n dissiplinêre ondersoek deur ‘n onpartydige kenner, tydens ‘n dissiplinêre verhoor deur die OBP-raad aan verskeie klagtes skuldig bevind. Die klagtes sluit in geldelike wanbestuur.
Die raad het aanbeveel dat Dyasi afgedank moet word, en het ‘n brief in dié verband aan die minister gestuur. Joemat-Pettersson moet nou ingevolge die akte van die OBP-raad se stigting dié aanbeveling bekragtig.
2 November 2010
