‘n Kleinhoewe-eienaar Pretoria-Noord was ook die slagoffer van aanvallers in die berugte Kameeldrift-omgewing.
Luidens ‘n berig in Beeld (26 Oktober) is mnr. Albertus de Jong vermoedelik tussen Donderdagnag (21 Oktober) en Sondagoggend (24 Oktober) met ‘n byl doodgekap.
De Jong was ‘n 66-jarige Nederlander wat in die 1980’s na Suid-Afrika gekom het. Hy was woonagtig op sy kleinhoewe, Perdefontein, naby Wallmansthal.
Nie opgedaag vir ete
‘n Vriendin van De Jong het Sondag op sy liggaam afgekom nadat sy en twee ander vriende hom by sy huis gaan soek het omdat hy nie vir ‘n gebruiklike ete-afspraak opgedaag of sy telefoon geantwoord het nie.
Die hoewe se hek en die huis se voordeur het oopgestaan, en een van De Jong se honde het by die oop deur waggehou. ‘n Tweede hond het by sy liggaam, wat onder plante op die werf versteek is, waggehou. Die moordwapen is naby die lyk gevind.
Die huis is geplunder en De Jong se voertuig is ook gesteel. Luidens die berig sê konst. Portia Maleka, polisiewoordvoerder, die voertuig is Maandagaand in Mamelodi, oos van Pretoria, ontdek.
Enige mense met inligting oor die voorval kan die Kameeldrift Polisiekantoor by 012 808 1215 of die noodnommer 10 111 skakel.
26 Oktober 2010
