Nóg ‘n raadsvergadering van die AgriSEB-raad het verlede week in Pretoria misluk en dít wat die raad moet bereik sloer voort, sê Agri SA.
Dr. Theo de Jager, onder-voorsitter van die organisasie wat die vergadering op 1 Desember bygewoon het, sê by die vergadering moes goedkeuring gegee word om sektorspesifieke kodes in die Staatskoerant te publiseer.
“Die Departemente van Waterwese en Omgewingsake en Landelike Ontwikkeling en Grondhervorming weier dat die kodes gepubliseer word alvorens ‘n studie oor die bekostigbaarheid van verlaagde drumpelwaardes vir uitgeslote klein en mikro-ondernemings afgehandel is. Geen diensverskaffer is tot dusver aangestel om die navorsing te doen nie, en die proses kan nog jare sloer,” aldus De Jager.
Laer drumpelwaardes
De Jager sê in 2007, ná drie jaar se onderhandelinge, is ooreengekom dat boerderye met ‘n omset van R5 miljoen of minder, van die telkaartvereistes uitgesluit gaan word en dat dié boerderye erkenning van ‘n vlak vier-bemagtigingsprestasie gaan geniet.
Intussen wil die vroeër genoemde departemente dié drumpelwaardes na ‘n omset van R1 miljoen verlaag sodat meer boere beïnvloed word, maar die organisasie glo dat dit nie haalbaar is nie vanweë winsgewendheidsoorwegings.
Onbereikbaar
Landbou.com is deur die Departement van Waterwese en Omgewingsake na die Departement van Landbou, Bosbou en Visserye oor navrae oor onder meer die genoemde studie verwys. Dié departement, asook die Departement van Landelike Ontwikkeling en Grondshervorming kon nie bereik word nie.
De Jager sê die werking van die raad maak glo deel uit van die prestasiekontrak wat Minister Tina Joemat-Pettersson vroeër met pres. Jacob Zuma aangegaan het. Hy sê die raad het steeds nie ‘n voorsitter nie, “en die gebrek aan leierskap het veroorsaak dat die raad sedert sy aanstelling in 2008 nog geen vordering gemaak het nie”.
10 Desember 2010
