Hy sê dit is noodsaaklik vir die Wes-Kaap se ekonomiese herstel en groei dat die hawe goeie diens lewer. “Die bedryfskwessies by die hawe het gelei tot swak dienslewering, wat ’n impak op die provinsie se ekonomie het. Die Covid-19-pandemie het hierdie situasie vererger.”
Intussen is dringende stappe gedoen om dienslewering by die hawe te verbeter. Mnr. Velile Dube is as die nuwe hoof van TPT aangestel en 20 personeellede is tydelik van die Durbanhawe na die Kaapstadhawe oorgeplaas om bykomende mannekrag te bied. Kaapstadhawe is ook onlangs met vier moderne vragvervoerders toegerus.
Daar was ook samewerking met die Wes-Kaapse departement van gesondheid en die departement van ekonomiese ontwikkeling en toerisme om Covid-19-gevalle te beperk.Maynier sê hierdie stappe het daartoe gelei dat verlede week 1 179 vraghouers per dag verskuif is, vergeleke met 533 in die week van 25 Mei, en dat skepe nou slegs ’n dag moet wag voor hulle by die hawe kan vasmeer. Voorheen sou hulle tot 20 dae gewag het.
“Dit is ’n aansienlike verbetering en as ons hierdie vlak van dienslewering gedurende die komende weke kan volhou, kan die verskepingsmaatskappye wat Kaapstadhawe tans oorslaan, teen die tweede week van Augustus weer die hawe gebruik.”
Hy sê daar is egter nog baie werk wat gedoen moet word en daarom is ’n projek met die samewerking van die departement van ekonomiese ontwikkeling en toerisme goedgekeur om data van die vrugtepakhuise in die Wes-Kaap te gebruik om die beste dae, tye en roetes vir die optimale lewering van vraghouers vir uitvoer te identifiseer. Die doel van die projek is om opeenhopings by die hawe te voorkom.
Bykomende stappe word ook ondersoek om die koste om handel te dryf by die Kaapstadhawe te verminder.
“Ek sien daarna uit om met mnr. Pravin Gordhan, minister van openbare ondernemings, en Transnet se bestuurspan te praat sodat die permanente strukturele veranderinge wat die Kaapstadhawe ’n globaal mededingende hawe sal maak, toegepas word,” sê Maynier.
