Die dertiende reeks van dié program sal vanjaar uitgesaai word.
Luidens ’n verklaring is Marciel, wat in 2016 as een van die top-12 finaliste in die Mej. Suid-Afrika-kompetisie aangewys is, die sesde aanbieder van Boer Soek ’n Vrou.
Die sangeres en aktrise Leah was die afgelope twee jaar die aanbieder van die program.
Marciel het drama aan die Universiteit Stellenbosch studeer. Sy het ook ’n honneursgraad in sielkunde aan Maties verwerf. Sy is ’n lewensraadgewer, ’n motiveringspreker en ’n beroepsmodel.
Sy het op ’n plaas in die Boland groot geword. Haar pa, Charles, is keldermeester by die De Grendel-wynlandgoed in Kaapstad.
“Ek is passievol oor mense en om ’n impak op hul lewe te kan maak, dus kon ek nie vir ’n beter geleentheid as Boer Soek ’n Vrou gevra het nie,” sê Marciel. “Ek is baie dankbaar vir hierdie geleentheid om deel te word van tien boere se soeke na liefde.”
Inskrywings vir boere wat aan die nuwe reeks van Boer soek ’n Vrou wil deelneem, open op 24 Februarie. Die reeks sal in Oktober op kykNET uitgesaai word.
