Die twee liggame het die aankondiging pas in Muldersdrif, Gauteng, gedoen waar meer besonderhede van die gestigde, geakkrediteerde MSD Dieregesondheidsakademie bekend gestel is waardeur boere en landboustudente reg oor Afrika bemagtig sal word.
Mnr. Jacques van Rensburg, nasionale opleidingsbestuurder oor herkouers van MSD, het gesê die maatskappy het die afgelope paar dekades baie mense by sy Malalane-akademie opgelei, maar nou neem die opleiding ’n groot stap verder met ’n aangepaste leerplan.
Mnr. Johann Stassen, besturende direkteur van i3A wat in Bloemfontein gesetel is, het gesê ’n droom het waar geword. Die eenjaarkursus vir ’n landbousertifikaat en ’n ekstra jaar om ’n diploma te verwerf, sal aanlyn aangebied en met praktiese opleidingsessies aangevul word. Dit kan mettertyd tot ’n vierjaar-graadkursus uitgebou word.
Dr. Alan Kloeck, MSD se hoofbestuurder vir Suid-Afrika en Afrika suid van die Sahara, het gesê die nuwe akademie neem opleiding tot ’n baie hoër vlak. “Dit is die begin van iets groot.” Benewens die formele kwalifikasies bied hulle ook kortkursusse in skaap- en beesgesondheid en biosekerheid aan.
i3A se oogmerk is om praktiese, bedryfsgerigte kennis en vaardighede oor te dra. Hy het in 2021-’22 reeds meer as duisend studente en boere in Afrika opgelei. Die ontstellende feit is dat 30% van opkomende boere se vee vrek weens ’n gebrek aan kennis oor dieregesondheid, biosekerheid en die verkeerde hantering en gebruik van medisyne.
Aansoeke vir die eerste inname van die akademie sluit op 31 Januarie, maar daar sal elke ses maande ’n nuwe inname wees. Die koste vir die volle kursus beloop R28 000 wat as volg saamgestel is: registrasiegeld van R2 000 gevolg deur twee betalings van R13 000 elk per semester. Om dit meer bekostigbaar te maak, kan die registrasiegeld van R2 000 gevolg word deur tien maandelikse debietorderbetalings van R2 750 elk.
Vir die verwerwing van ’n nasionale sertifikaat met spesialisasie in dieregesondheid op NKR vlak 4 konsentreer die kurrikulum op onder meer basiese rekenaar- en kommunikasievaardigheid, toegepaste wiskunde en statistiek, landbouwetenskap, landboubestuur en -ekonomie, dierewetenskap en dieregesondheid en biosekerheid.
Vir die verwerwing van ’n nasionale diploma (NKR vlak 5-kwalifikasie) kan die student vir ’n tweede jaar inskryf waartydens toegepaste wiskunde en statistiek, dierewetenskap, dieregesondheid en -biosekerheid en landboubestuur en -ekonomie op ’n gevorderde vlak toegelig word.
’n Nasionale sertifikaat in landbouverkope en -dienste op NKR vlak 4 word ook as ’n volledige kwalifikasie aan verkoopspersoneel aangebied.
Verskeie praktiese, kort vaardigheidskursusse in dieregesondheid word landswyd aangebied.
Vir meer besonderhede oor die modules en hoe om aansoek te doen, gaan na www.msd.i3a.africa, of stuur ’n epos aan info@msd.i3a.africa, of skakel 051 444 0201.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
