Hy glo die nalatenskap van dr. André Jooste, vorige uitvoerende hoof, sal hom in sy visie vir die organisasie bemagtig.
Jacobs sê hy wil voortbou op die grondslag wat Jooste gelê het, deur sy ervaring in die finansiële sektor in die aartappelbedryf aan te wend om aartappelprodusente se wins te help optimaliseer. Hy wil ook die aansien van die aartappel in die verbruiker se oë na ’n hoër vlak neem.
Pak alle risiko aan
“Dit is belangrik om die vermoë te ontwikkel om al die risiko’s aan te pak wat die gehalte, volume en verbruikbaarheid van aartappels kan beïnvloed. Dit is dus belangrik dat ASA volgehou die navorsingskapasiteit verskaf om hierdie kwessies aan te pak. Die produsent moet al die faktore wat ’n invloed op sy besigheid sal hê, verstaan om ingeligte besluite te kan neem.
“Ons wil die mark vir aartappels dermate uitbrei dat daar spasie is vir nuwe toetreders sonder dat die bestaande produsente nadelig beïnvloed word. My rol by ASA is toegespits op akkuraatheid en die toepaslikheid van die organisasie se uitset deur middel van ’n inklusiewe en deelnemende bestuurstyl.”
Jacobs, wat die graad BSc in landbou-ekonomie aan die Universiteit van die Vrystaat en ’n MBA-graad aan die Noordwes-Universiteit verwerf het, was die hoof van korporatiewe kliënte by die Land Bank voordat hy as uitvoerende direkteur by Obaro Finansiële Dienste aangestel is. Daarna het hy as onafhanklike konsultant kontrakte vir landboufinansiering en -bestuur behartig voordat hy die pos as uitvoerende hoof by ASA aanvaar het. Jooste was nege jaar die uitvoerende hoof van ASA gedien voordat hy verlede jaar bedank het.
