Die Regering moet die landboupraktyke wat voor 1994 suksesvol was weer vir implementering oorweeg, sê mnr. Langa Zita, nuwe direkteur-generaal van die Departement van Landbou, Bosbou en Visserye.
Hy is pas in dié posisie aangestel.
Luidens ‘n berig in Beeld (7 September) het Zita gister tydens ‘n Parlementêre sessie saam met me. Tina Joemat-Pettersson, Minister van Landbou, Bosbou en Visserye, gesê 16 jaar ná die koms van demokrasie is dit tyd om te kyk na wat vroeër vir die landbousektor dienstig was.
“Kommersiële landbou in dié land het ‘n bepaalde geskiedenis en agtergrond wat ons nie kan ignoreer nie. Landbouers is in die verlede byvoorbeeld deur regeringsubsidies gesteun. Dis nou die tyd om te gaan kyk wat het gewerk en om te verseker dit word teruggebring. Dis nie ‘n ideologiese kwessie nie, maar eerder historiese feite,” verduidelik Zita.
“Kommersiële landbou werk”
Volgens Zita moet kommersiële landbou versterk word. “My vernaamste doelwit in dié pos is te verseker dat dít wat in landbou werk, gesteun word. Kommersiële landbou, in ag genome al sy uitdagings, wérk. Dit verseker voedselsekerheid.”
Intussen het Joemat-Pettersson opgemerk dat maniere gekry moet word om boere met goedkoop langtermynlenings by te staan. Sy is ook bekommerd oor die departement se navorsingsvermoëns. Sy sê landboukolleges word heropen en het ‘n ooreenkoms met die Departement van Openbare Werke aangegaan oor ‘n perseel vir ‘n navorsingseenheid.
“Musiek op ons ore”
Intussen sê dr. Theo de Jager, ondervoorsitter van Agri SA, Zita se opmerkings oor kommersiële landbou is “musiek op ons ore. Hy gee eintlik verstommende erkenning aan kommersiële landbou wat ‘n vars bries is onder amptenare.”
Hy sê die organisasie is dankbaar vir die nugterheid wat met die opmerkings aan die dag gelê word, want daar was sekere kriteria wat voor 1994 in plek was wat niks met apartheid te doen gehad het nie. “Baie voor-’94 werkswyses kan toegepas word.”
“Ons dink daar kan iets hiervan kom. Ons is al vir amper ‘n jaar in gesprek met die minister oor moontlikhede soos staat ondersteunde projekte. Ons hoop hulle gaan die Land Bank ook hierby betrek,” sê De Jager.
7 September 2010
