Mnr. Peter Cloete is op Agri Oos-Kaap se virtuele jaarkongres tot nuwe president verkies.
Cloete, ’n skaapboer van Dordrecht, neem die leisels oor by mnr. Doug Stern, wat uitgetree het nadat hy sedert 2015 die amp beklee het. Cloete sal bygestaan word deur mnr. Eben du Plessis as ondervoorsitter van Agri Oos-Kaap.
“Ons is in ’n soliede posisie gelaat deur Doug Stern, wat ons ’n goeie rigting gegee het waarheen ons kan beweeg. Ons hoop ons kan voortbou op die diensvlakke wat ons vir die boere gee.”
Volgens Cloete is die droogte, wat ’n derde van die provinsie tans in ramptoestande laat, een van die belangrikste kwessies wat nou uitgesorteer te word. Nog ’n bekommernis is die toename in werkloosheid en die oproer wat daarmee gepaard gaan.
“Ons sal moet werk maak daarvan dat die regering die streng arbeidswette moet versag sodat ons mense in diens kan neem.”
Cloete sal sy termyn as voorsitter begin met die organisasie wat ’n nuwe bestuurstruktuur sal inneem. Daar is tydens die kongres ingestem dat die Agri Oos-Kaap voortaan as ’n organisasie sonder winsbejag sal funksioneer (bit.ly/3AUhYtJ).
“Dit is opwindend en die stelsel maak dit moontlik dat mense verantwoordbaar gehou word vir wat hulle doen. Dit laat ook mense in beheer toe om vinniger besluite te neem.”
Hy sê hoewel daar aan die begin probleme kan wees om die nuwe struktuur te vestig, is gekyk na wat Agri SA doen. Hy is baie opgewonde oor die vooruitsigte.
