Nuwe plaagdoder vir sprinkane geregistreer

Sprinkaanswerms kom steeds in die Noord- en Wes-Kaap voor, maar dit is die swerms wat in sitrusboorde in die Oos-Kaap inbeweeg, wat tans die grootste bron van kommer is.

Mnr. Eben du Plessis, ondervoorsitter van Agri Oos-Kaap, sê daar is tans sowat 10 aktiewe swerms by Middelburg en dat verdere swerms by Graaff-Reinet, Aberdeen, Steytlerville, Kirkwood en Willowmore voorkom.

Die sprinkane het volgens hom reeds in die sitrusboorde begin inbeweeg. Hulle vreet meestal net aan die gras tussen die bome, maar sommiges het al aan die bome se blare begin vreet, wat die vrugte se rypwording kan beïnvloed.

Die departement van landbou, grondhervorming en landelike ontwikkeling het twee vliegtuie vir die bestryding van die swerms verskaf.

Deltanex UL is vir die bestryding van sprinkane geregistreer en Decis, ’n plaagdoder wat reeds vir die bestryding van sprinkane geregistreer is, is nou ook vir lugbespuiting geregistreer. Sumi-Alpha-poeier word ook tans gespuit. Du Plessis sê 13 spuitpompe is met geld uit Agri SA se rampfonds gekoop om dié poeier te spuit.

“Dit gifsituasie is nie lekker nie. Ons probeer elke week om voorrade aan te vul. Ons word goed bygestaan deur die sitrusbedryf wat vervoer en finansiering verskaf het sodat ons gif in De Aar kon gaan haal.”

Volgens hom vergader die georganiseerde landbou nou elke Woensdag met nasionale en provinsiale departemente van landbou om kwessies in verband met die bekamping van sprinkaanswerms te bespreek.

Volgens dr. Ivan Meyer, Wes-Kaapse minister van landbou, het die voorkoms en grootte van swerms in die Sentrale-Karoo en die Tuinroete verminder. Hy sê geen verdere swerms is die afgelope week in Laingsburg opgemerk nie en die hoeveelheid en grootte van swerms in Murraysburg en Beaufort-Wes het verminder.

Een swerm is in Prince Albert aangemeld en twee in Merweville. Nog ’n groot swerm, wat in ’n suidwestelike rigting beweeg, is 30 km buite Beaufort-Wes opgemerk. Voetgangers is in die Kliprand-gebied van die Weskus opgemerk.