’n Vinnige geboorte. Dít is landboukenners se mening oor ’n besluit om ’n verenigde spreekbuis vir die landbousektor te stig.
Leiers van oor die hele spektrum van landbou-organisasies het in Pretoria in beginsel ooreengekom om ’n nasionale forum te stig wat voortaan oor kwessies van deurslaggewende belang vir die landbousektor met belanghebbendes, waaronder die Regering, sal onderhandel.
Dit sal ’n einde bring aan die huidige versnipperde gesprekvoering tussen die staat en landbouverteenwoordigers. Waarnemers beskou dit as ’n belangwekkende ontwikkeling wat nie net op onderhandeling met die staat gemik is nie, maar ook op die sektor self.
Positiewe verandering
“Die landbou het eintlik iets nodig waardeur hy veral ook met homself kan omgaan in al sy gedaantes. Soos Ghandi sê: Ons moet die verandering wees wat ons in die wêreld wil sien. Daarby moet die forum ook die beweeg na nie-rassigheid verbeeld,” het ’n ingeligte aan Landbouweekblad gesê.
Die gemak waarmee die besluit geneem is, word as verbasend bestempel, hoewel die betrokkenes by die vergadering onder geen wanindruk verkeer oor die struikelblokke wat nog wag nie.
Die instansies wat hulle tot die stigting van die beoogde forum verbind het, is Agri SA, die TLU SA, die nuutgestigte Afasa, die National African Farmers’ Union (Nafu), die Landboubesigheidskamer en die Landbouverwerkersvereniging.
Vordering
Arbeid, vroue en die jeug ontbreek, maar betrokkenes het te kenne gegee dat daaraan gewerk word. Die plan is dat die onderskeie organisasies ter wille van vroeë vordering hul eie identiteit in die forum sal behou, maar dat dit eenparig oor sleutelkwessies met die Regering sal onderhandel.
Daaronder word grondhervorming, werkskepping en voedselsekerheid as die vernaamstes uitgelig.
Die gedagte is egter dat daar mettertyd na ’n ware enkele organisasie beweeg sal word met “sterk genoeg lym” om al die uiteenlopende organisasies bymekaar te hou.
’n Taakspan is saamgestel om gestalte te gee aan die besluit. Dit bestaan uit mnre. Jannie de Villiers van Graan SA en Aggrey Mahanjana van die organisasie vir ontwikkelende rooivleisprodusente (Nerpo), dr. John Purchase van die LBK, dr. Johan van Rooyen van die Standard Banksentrum vir landboubedryfleierskap, en mnr. Nico Kruger van die Landbouverwerkersorganisasie.
Kern-aspekte
Kern-aspekte wat die komitee sal moet uitstryk, is onder meer ’n naam vir die forum, die samestelling en finansiering daarvan en die praktiese werkwyse wat gevolg gaan word om eenstemmigheid te vind.
Op die vergadering is voorgestel dat die forum grootliks op dieselfde beginsels kan funksioneer as die model wat in die sakewêreld tot stand gebring is.
23 November 2011
