Die departement sê in ’n verklaring die strategie is ’n raamwerk vir die pryse van watergebruik, soos die gebruik van ongesuiwerde water uit riviere, boorgate en/of verskaf deur staatskemas en die afvoer van water na ’n waterhulpbron of grond.
“Kragtens artikel 56 van die Nasionale Waterwet (Wet 36 van 1998) kan die minister van water en sanitasie, tesame met die minister van finansies, elke nou en dan deur ’n kennisgewing in die Staatskoerant ’n prysstrategie bepaal vir enige watergebruik binne die raamwerk van bestaande relevante regeringsbeleid,” luidens die verklaring.
Artikel 56 (3) (a) bepaal dat die prysstrategie op billike grondslag mag onderskei op grond van geografiese gebiede, tussen verskillende kategorieë van watergebruik en ook tussen verskillende watergebruikers.
Die jongste prysstrategie maak voorsiening vir ses watergebruikerskategorieë, pleks van die vorige drie, om volgens die departement die watergebruikersgroepe beter te verteenwoordig en vir duideliker toegespitste tariewe voorsiening te maak.
Die hersiene prysstrategie maak verder voorsiening vir vyf waterhulpbrontariewe, naamlik waterhulpbronbestuur-, waterhulpbroninfrastruktuur-, afvalwaterversagtings-, en ekonomiese reguleringstariewe, asook ’n waternavorsingsheffing.
Geskrewe kommentaar kan gestuur word na pricing-strategy@dws.gov.za of NyabanyabaL@dws.gov.za.
Die strategie word in September op die volgende plekke bespreek: 6 September in eMalahleni, 7 September in Malelane, 8 September in Mbombela, 12 September in Vanderbijlpark, 13 September in Alberton en 14 September in Pretoria.
