Nog ’n dokumentêr oor die Suid-Afrikaanse wynbedryf het die lig gesien. Hierdie keer vertel dit die positiewe verhaal van opheffing en transformasie in die bedryf. Die video, van bykans 20 minute lank, is deur Wines of South Africa vervaardig en versprei.
Hulle noem dit Creating the blend. Dit volg na die joernalis Tom Heinemann se dokumentêr getiteld Bitter Grapes, oor swak werkstoestande in die wynbedryf, in Oktober verlede jaar opslae gemaak het in Denemarke en Swede.
“Daar is nog baie om te doen, maar ons behoort ook erkenning te gee aan al die liggame wat help met die welstand en positiewe groei van die 291 000 mense wat binne die wynbedryf werk,” lui ’n verklaring oor die nuwe dokumentêr.
Waarde toegevoeg
Die dokumentêr fokus veral op die goeie werk wat die VinPro-stigting en Wieta (die wynbedryf se vereniging vir etiese handel) doen, asook opheffingswerk op plase soos Bosman Family Vineyeards en by kelders soos Bonnievale Wyne.
“Ek het besef ek kan nie op my eie uitbrei nie, en wie gaan jou beter help as jou werksmense,” vertel mnr. Jannie Bosman van Bosman Family Vineyards op Wellington in die video, wat onder meer melding maak van ’n nuwe moderne woonstelkompleks wat die onderneming vir sy plaaswerkers opgerig het.
Verskeie ander programme wat waarde toevoeg tot wynbedryfswerkers word ook belig. Dit sluit in grondeienaarskap, opvoeding, gesondheidsorg, opleiding en sake-geleenthede. “Die gesegde sê mos Rome was nie een dag gebou nie. Dis ook die werklikheid vir die Suid-Afrikaanse wynbedryf, maar dis opwindend om te weet die spreekwoordelike paaie word gebou, gelyk gemaak en geteer vir ’n gladder, meer genotvolle rit vir almal wat by die bedryf betrokke is,” lui die verklaring.
Kliek hier om na die video te kyk.
