Die bedryfsafdeling van Onderstepoort Biologiese Produkte (OBP) is vol vertroue dat voldoende entstowwe beskikbaar sal wees om die mark volgende jaar te bevredig.
Dit is die skriftelike onderneming wat dié regeringsentiteit gee nadat hy die afgelope twee finansiële jare hewig onder skoot gekom het omdat entstowwe nie beskikbaar was wanneer boere dit benodig het nie. Dit is bekend dat veeboere in die land byna twee jaar moes klaarkom sonder genoeg entstowwe teen siektes, soos brucellose, bloutong en knopvelsiekte.
Volgens OBP se jongste jaarverslag wat hy in die Parlement ter tafel gelê het, sal sy produksieprobleme binnekort iets van die verlede wees met die opgradering van sy geriewe wat voortstoom. Volgens die verslag was daar erge entstof-tekorte weens kritieke toerusting wat gebreek het en verskaffingsprobleme wat ondervind is.
Het in die vraag voorsien
OBP wys uit dat in die 2015/'16 finansiële jaar gefokus is op die produksie van kritieke antigene vir virale en bakteriële entstowwe om beskikbaarheid van die produkte te verseker waarvan nie genoeg geproduseer was nie. "Hierdie benadering het die vraag vir virale produkte bevredig en verseker dat genoeg voorraad bakteriële antigene opgebou word."
In die betrokke finansiële jaar is 233 bondels entstowwe vervaardig, wat 'n 166% verbetering is op die 134 bondels wat in 2014/'15 geproduseer is.
Volgens die verslag was die produksie vir virale entstowwe wat gedurende die afgelope winter benodig was, teen einde Maart tussen 80% en 90% gereed om die mark reg deur die winter te voorsien.
Genoeg entstof
Volgens die OBP was daar genoeg entstof vir bloutong, Afrika-perdesiekte, en B.Phemeral vir die voorkoming van drie-dae-stywesiekte beskikbaar.
Die organisasie het ook in die geldjaar 2016 'n styging in die hoeveelheid entstowwe wat onbruikbaar geraak het, ervaar.
Volgens die jaarverslag is die "ergste" verby en dat dit selfs net nog beter in die huidige finansiële jaar, 2016/'17, sal gaan.
