Volgens die nasionale landboubemarkingsraad (NBLR) toon sy jongste vraag-en-aanbodramingsverslag dat Suid-Afrika ’n koringreserwe van 67 dae het en ’n mieliereserwe van 88 dae.
Drr. Christo Joubert, Ndiadivha Tempia en Sifiso Ntombela, en mnr. Thabile Nkunjana, landbou-ekonome van die raad, sê in ’n verslag Suid-Afrika se mark is verweef met die wêreldmark. Wat in Rusland en Oekraïne gebeur, sal waarskynlik plaaslike pryse raak.
“Mielies en koring is van die groot stapelvoedsels in Suid-Afrika. Daarom sal enige ontwrigting in die voorrade deur verbruikers en alle deelnemers in die waardeketting gevoel word.
“Die oplossing of pogings om die dreigende gevaar van beperkte voedselvoorrade te versag, sal ’n multilaterale benadering verg, wat koördineringspogings in verskeie hawens kan behels asook die nodige finansiële steun vir die lande wat geraak word,” luidens die verslag.
Voedselpryse reeds hoog
Suid-Afrikaners ervaar reeds stygende voedselpryse vir die meeste stapelvoedsels soos mielies, koring en diereproteïen.
“Die huidige situasie tussen Rusland en Oekraïne gaan heel waarskynlik ’n uitwerking hê op die koste van die produksie en verspreiding van voedsel en uiteindelik op die eindgebruiker (verbruikers),” luidens die verslag. Dit kan veral koringprodukte soos brood raak, asook groente-olies, wat kook- en diereprodukte kan raak, veral pluimvee- en varkprodukte, wat swaar steun op groente-olies en proteïenmeel.
Die landbou-ekonome sê klimaatsgebeure, soos droogte weens die La Niña-weerstoestande, raak reeds belangrike voedselproduserende streke in die wêreld en veroorsaak dat daar laer wêreldoordragvoorrade vir die 2021-’22-bemarkingseisoen is.
Volgens data van die Verenigde Nasies se Voedsel-en-landbou-organisasie was sekere voedselkommoditeitspryse in Januarie vanjaar die hoogste ooit.
Grootmaataankope deur invloedryke lande soos China en Indië dra klaarblyklik by tot hoë wêreldvoedselpryse. Luidens die verslag probeer dié lande hul voorraadreserwes verhoog om hul plaaslike pryse laag te hou in die lig van die knapper voedselvoorraadvlakke wat die internasionale graanraad einde Februarie aangekondig het.
