Die staat gaan die week diere in die Keimond- en Hagga-Haggadistrikte in die Oos-Kaap teen Slenkdalkoors begin inent, sê die Amathole-distriksmunisipaliteit.
Luidens ‘n berig op News24.com sê dr. Cebisa Mnqeta, die senior bestuurder van die Oos-Kaap-Veeartsenykundedienste, dít volg na ‘n uitbraak van die siekte verlede week in die omgewing bevestig is.
Beamptes van die Amathole-distriksmunisipaliteit en die Departement van Landbou het Dinsdag met boere in die omliggende omgewing vergader om die situasie te bespreek.
“Vrese dat oningeligte lede van die gemeenskap siek vee hanteer en sodoende die siekte van dier na mens oordra, bestaan”.
Intussen het die nasionale Departement van Landbou Dinsdag, 1 Februarie 2011, aan Landbou.com gesê dat hulle slegs bewus is van die gevalle in die Wes-Kaap en die een wat by Graaff-Reinett bevestig is.
Die vermoedelike geval in die Bronkhorstspruit-omgewing in Gauteng se toetse was glo negatief.
Oor enige ander moontlike voorvalle doen hulle nog navrae.
Bron: News24.com
2 Februarie 2011
