Me. Mildred Oliphant, Minister van Arbeid, gaan op 16 Maart “50 probleemplase” naby die Paarl besoek.
Die Wes-Kaap is die sewende provinsie waar sy plase gaan besoek. Dit sal die eerste keer wees dat Oliphant Paarlse plase besoek. Ná haar besoek aan die Oos-Kaap het Oliphant gesê 62 plase voldoen nie aan arbeidswetgewing nie. Sy het hulle 21 dae gegee om hul sake in orde te kry voor opvolgbesoeke sou plaasvind.
Mnr. David Esau, voorsitter van die beplanningskomitee by die plaaslike department van arbeid, sê die Paarlse plase is gekies op grond van briewe wat hulle van verskeie organisasies ontvang het en klagtes wat op hul eie databasis aangeteken is.
“Dit hou verband met wetgewing wat nie nagekom word nie.” Esau sê die minister sal veral let op die nakoming van wetgewing, die toepassing van beroepsveiligheid en gelyke indiensneming wanneer sy die plase besoek. Plaaseienaars “sal vir beplanningsdoeleindes” verwittig word van die besoek.
Volgens Esau hou die besoek nie verband met die parlementêre portefeuljekomitee oor arbeid se onlangse besoek aan Wes- Kaapse plase nie. Hy sê dit het ook niks met die verslag te doen wat die organisasie Human Rights Watch verlede jaar bekend gestel het nie.
Imbizo
’n Dag ná die besoeke word die minister se “imbizo” by die Mbekweni-rugbystadion in die Paarl gehou. Daar word voorsiening gemaak vir sowat 2 000 mense. Esau sê hul teikengehoor is plaaswerkers.
Die Regering sal ook vir busvervoer betaal om die plaaswerkers se teenwoordigheid by die imbizo te verseker. “Daar is geen beperking op sake wat aangeroer kan word nie.”
Me. Porchia Adams, korporatiewe kommunikasiebestuurder by Agri Wes-Kaap, het ’n beroep op Esau gedoen om gebalanseerd te wees wanneer hulle Oliphant inlig oor die plaaslike landboubedryf.
“Dit is my werk om die landbou te beskerm en ek het ervaring met imbizo’s wat in die verlede nie baie gebalanseerd was nie.”
2 Maart 2012
