Bewerings van ’n stasiebevelvoerder wat met ’n stasievoertuig rondry en ’n gebrek aan voertuie om na tonele te ry asook ’n polisiebeampte se skakeling met die media gaan by die Bloemfonteinse veediefstaleenheid ondersoek word.
Kapt. Steve Roets, polisiewoordvoerder, sê ’n berig oor ’n voorval het in die Volksblad verskyn omdat drie lede glo ontevrede is met kwessies wat intern opgelos moet word.
Volgens die berig ry die bevelvoerder met die eenheid se nuwe Volkswagen Amarok-bakkie rond, terwyl beamptes nie genoeg voertuie het om by boere uit te kom nie. Die polisielid wat met die koerant gepraat het, sê hulle moet boere bel om hulle te kom haal om by klagtes uit te kom.
Boer het aangebied
Roets sê die inligting wat hom meegedeel is, is dat vyf voertuie vir die eenheid beskikbaar is. Die boer wat die beampte kom haal het, het glo aangebied om dit te doen omdat die beampte aangedui het dat hy die klag sal ondersoek sodra ’n voertuig beskikbaar is.
Volgens Roets het die eenheid 10 voertuie beskikbaar. Hy sê op die betrokke dag was net vyf van die voertuie beskikbaar omdat vyf versien moes word of herstelwerk moes ondergaan.
Brig. Billy Jones, provinsiale skakelbeampte, het aan die koerant gesê dat die bevelvoerder se voertuiggebruik intern ondersoek word. Die eenheid val onder die Parkweg-polisiestasie. Hy sê tien voertuie is by dié stasie beskikbaar, en twee van dié vloot is na Selosesha-distrik ontplooi.
Bron: Volksblad
