UPL is een van die grootste vervaardigers en verspreiders van landbou-chemikalieë en biologiese produkte ter wêreld. Die ondersoekende joernalistieke organisasie AmaBhungane berig asetechlor, 2,4-D, MCPA, dikamba, alpha-siepermetrien, mikro-elemente en biologies voordelige organismes het tydens die brand in die slag gebly.
UPL het teen druktyd nog nie die volume van hierdie produkte bevestig nie, maar het in ’n verklaring gesê die maatskappy is besig om hierdie produkte te vervang en dat dit betyds sal wees vir die komende somergraanplantseisoen.
Voldoen aan regulasies
Luidens ’n verklaring wat die maatskappy einde verlede maand uitgereik het, het die pakhuis aan al die regulasies vir hoogs gevaarlike aanlegte voldoen. Op 11 Augustus het ’n parlementêre oorsigkomitee die UPL-pakhuis besoek omdat omliggende gemeenskappe ontevrede is nadat meer as 1 600 vorme van chemikalieë in die Mhlanga-rivier en -riviermond beland het.
Die opvangbad vir stortings by die pakhuis voldoen aan die regulasies, maar brandbestryders moes ’n abnormale volume water gebruik om die vuur, wat ’n week lank in die pakhuis gebrand het, te blus. Die water in die bad, wat met die gelekte chemikalieë vermeng was, het oorstroom en in die Mlanga-rivier beland. Dit het skade aan diere en plante in en om die rivier aangerig.
Daarbenewens is die omliggende gemeenskappe ook ontevrede omdat hulle asemhalingsprobleme ondervind weens die chemikalieë wat in die lug vrygestel is deur die hitte en omdat hulle nie meer water uit die rivier kan onttrek vir groentetuine nie.
Die oorsigkomitee het gevra dat ’n platform vir verdere interaksie tussen belanghebbendes gestig word, dat skadevergoeding vir die gemeenskapslede oorweeg word en dat finansiële hulpbronne beskikbaar gemaak moet word om op die aanbevelings van die voortgesette ondersoek te reageer.
