Die departement het op 23 November vanjaar die strukture gesloop wat die vloei van die Groot-Nylrivier belemmer het, die kragtoevoer na geïnstalleerde pompe ontkoppel en onwettige boorgate verseël sodat water stroomaf na watergebruikers aan die Nylrivier kan vloei.
Die betrokke boer, wie se naam aan Landbou.com bekend is, het gesê hy wil nie in dié stadium kommentaar lewer op die inligting wat die departement verstrek het nie.
Die departement het by navraag gesê hy het in 2020 ’n klag van die Limpopo-departement van ekonomiese ontwikkeling, omgewing en toerisme ontvang oor onwettige damme wat na bewering op die betrokke plaas naby Bela-Bela gebou is. Die Limpopo-departement het beweer dat die grondeienaar oewerplantegroei verwyder en die vloei van die waterweg belemmer en weggelei het.
