Pleks daarvan dat dié wetgewing potensiële en bestaande tabakverbruikers afskrik, het dit hulle in die gretig wagtende arms van die onwettige tabakhandel gedryf.
Mnr. Tobela Tapula, uitvoerende hoof van die Suid-Afrikaanse tabaktransformasie-alliansie (Satta), wys daarop dat onwettige tabakprodukte nou 54-70% van alle tabak wat landwyd verbruik word, uitmaak. Dit is ondanks “sommige pogings” deur wetstoepassingsagentskappe om teen misdadige tabakvervaardigers en -handelaars op te tree.
“Ongelukkig sal dié situasie waarskynlik vererger as die regering voortgaan met nuwe drakoniese tabakwetgewing wat sommige vorme van (tans wettige) tabakgebruik onwettig sal maak en uiterste maatreëls vir (wettige) tabakprodukte sal instel. Dit sal net die onwettige sektor help.”
