Om van Suid-Afrika se verwagte mielie-oorskot in die komende seisoen ontslae te raak moet dit so vinnig moontlik landuit. In die proses moet Afrika as ’n mark nie uitgesluit word nie, sê prof. Ferdi Meyer, direkteur van die Buro vir Voedsel en Landbou-beleid (BFAP).
Hy het by Graan SA se kongres buite Bothaville gesê goeie uitvoermoontlikhede bestaan in lande in die sentrale en oostelike dele van Afrika, soos Kenia en Tanzanië. “Daar is probleme met geneties gemodfiseerde (GM) mielies maar kontrakte vir geel GM-mielies sal waarskynlik moontlik wees al is daar dalk probleme met die uitvoer van wit milies.”
Hy reken as pryse by R1 830 per ton trek, sal mielie-uitvoere begin. Dr. Erhard Briedenhann, uitvoerende hoof van MIDS, ’n maatskappy wat grondstowwe aan die veevoerbedryf verskaf, stem saam dat die Safex-pryse nog tussen R100 en R150/ton moet daal om uitvoere te laat begin.
SA het lank nie diepsee-uitvoer gehad
“ 'n Faktor is natuurlik dat ons vir 'n tyd lank nie diepsee-uitvoer van geel mielies na lande soos Japan, Korea en China gehad het nie. Hulle kry intussen hul mielies uit Argentinië en ander lande en ons sal hulle vertroue moet terugwen,” het mnr. Jannie de Villiers, uitvoerende hoof van Graan SA, gesê.
Op 'n vraag of probleme met die uitvoer van GM-mielies na China sal opduik, het dr. Marinda Visser, bestuurder graannavorsing en beleid by Graan SA, gesê daar is 'n protokol wat bevestig dat GM-kultivars wat in Suid-Afrika goedgekeur is, ook daar goedgekeur is. Selfs die stapelgeen-kombinasies wat onlangs plaaslik goedgekeur is om die invoer van wit mielies uit Amerika moontlik te maak, is in China goedgekeur.
Sy het ook bevestig dat die voorkoms van herfs-kommandowurms geen invloed op mielie-uitvoere sal hê nie.
