Die daarstelling van ’n enkele oudit vir voedselveiligheid is reeds ver gevorder, ten spyte van talle moeilikhede wat oorkom moes word, sê me. Ronel Burger, hoof van die Verbruikersgoedereraad (VGR) se voedselveiligheidsafdeling.
Burger was ’n spreker op die SA Vleisverwerkersvereniging (Sampa) se kongres naby Irene. Die doel van die enkele oudit is om die verbruikers se gesondheid en veiligheid te verseker en die bedryf te beskerm.
Terselfdertyd kan dit die koste van voedselvervaardiging verlaag. Tans moet ’n voedselverskaffer ’n voedseloudit oorhandig aan elkeen van die kleinhandelwinkels aan wie hy verskaf.
Die VGR wou in 2010 reeds só ’n oudit daarstel wat vir alle kleinhandelaars geld, maar verskeie faktore het veroorsaak dat dié oudit steeds nie ’n werklikheid is nie. Die Mededingingskommissie was een van die partye wat die daarstelling van ’n enkele oudit bemoeilik.
“Hulle was aanvanklik bekommerd dat dié enkele oudit dit moeiliker sal maak vir nuwe toetreders om die sektor te betree,” sê Burger. Dié kommer is intussen uit die weg geruim.
4 Mei 2012
