’n Volhoubaarheidstudie word tans onderneem ná melkboere in die Overberg besluit het om ’n maatskappy te stig.
Mnr. Johan du Toit, voorsitter van die Overberg-suiwelaksiegroep, sê melkboere in die omgewing het onlangs ’n vergadering gehou waarop dié besluit geneem is.
’n Ingenieur doen nou ’n volhoubaarheidstudie onder leiding van mnr. Orton King, uitvoerende direkteur van die Agri Mega-groep.
Die maatskappy se hoofdoelwit is om volhoubare melkboerdery te ondersteun. Verder sal so ’n maatskappy onderneem om die eerste suiwelaanleg in die Overberg te hê. Tweedens sal dit poog om produksiekoste te verlaag en derdens wil dit fokus op swart bemagtiging in die distrik en bedryf.
Prysverhoging
Du Toit sê Parmalat het op 1 Oktober 2011 sy prys per liter melk aan boere met 15c verhoog. “Maar, dit is deur die hoër voerprys ingesluk, so ons sit maar steeds in dieselfde bootjie.”
Sedert die verhoging ingestel is, het die prys van voer met gemiddeld R150 per ton gestyg, en Du Toit sê baie boere in dié distrik bly maar moedeloos.
Hy sê die afgelope week het nóg ’n melkboer die tuig neergelê. “Sy beeste is klaar opgelaai om verkoop te word.” Die groep het in Julie vanjaar bekend gemaak dat 21 melkboere toe reeds die bedryf verlaat het. Du Toit sê dié getal staan tans op net onder 30.
28 Oktober 2011
