Oos-Vrystaatse boere hoop vir sonskyn tot die einde van Januarie om hul koringoeste van die lande af te kry, hoewel meer reën vir die distrik voorspel word.
Mnr. Dirk Viljoen, voorsitter van Bethlehem se boerevereniging, sê minder reën het die afgelope twee weke voorgekom en die meeste boere kan tans stroop.
“Baie van die ouens haal wel swak grade koring af, ek praat van voergraad en utiliteitsgraad. So daar is maar verliese. Die lande is droeër, maar ons kan nog nie volspoed aangaan nie – net so teen kwartspoed,” vertel Viljoen.
Groot kommer het aan die begin van die jaar geheers na milde reën in die distrik, die sentrale deel van die Vrystaat en die noorde van die land geval het en boere nie in hulle lande kon kom nie.
Viljoen sê hoewel die reën afneem, hoop hulle ook vir sonskyn, aangesien die lande nie vinnig droog word as dit bewolk bly nie. Mielies en soja kry swaar Viljoen sê die mielies in die distrik “lyk nie te onaardig nie. Hulle het egter op ‘n paar plekke versuip en staan geel-geel op die lande. Die soja kry ook swaar met versuipskade”.
Volgens Viljoen hoop die boere steeds vir goeie mielie- en soja-oeste. Hy sê sonskynweer sal ook goed wees vir die aanplantings. Intussen is die kanse vir reën in die distrik oor die komende naweek tussen 60% en 80%. Viljoen sê hulle hou duim vas dat die weer in hulle guns sal werk.
19 Januarie 2011
