Sommige slaghuise moes die afgelope 24 maande hul benaderings verander en voorsiening maak vir nuwe maniere van sake doen, het mnr. Dewald Olivier, uitvoerende hoof van die Suid-Afrikaanse Voerkraalvereniging, op die 17de jaarlikse Cleaver-toekenningsgeleentheid in Kempton Park gesê.
Hoewel van die slaghuise hard deur die pandemie getref is, bevestig vanjaar se toekennings opnuut hul waarde. Dit wys ook dat die rooivleisbedryf, ondanks verskeie struikelblokke die afgelope twee jaar, steeds kragtig is.
Olivier het gesê die bedryf ondergaan groot veranderinge, onder meer rakende sy statutêre heffing, en wil seker maak dat hy voortdurend verander en sy aandag toespits op die kwessies wat die belangrikste is.
Die verskillende organisasies wat onder andere boere, voerkrale en slagplase se belange dien, stig as deel van die proses ’n dienstemaatskappy wat hom tot groot mate sal toespits op die bevordering van diere- en openbare gesondheid. Olivier het gesê dit gaan uiteindelik oor die veiligheid en verkoopbaarheid van die produk. “Ons wil ’n produk op rak sit wat met die beste ter wêreld meeding.”
Vanjaar se wenners
Die Cleaver-toekennings is ’n inisiatief van die rooivleisbedryfsforum. Slaghuise word beoordeel aan gehalte, diens, higiëne en waarde vir geld. Nadat hulle ingeskryf het, bring verbruikers hul stemme uit. Alle slaghuise wat meer as 100 stemme kry, word dan anoniem deur die Suid-Afrikaanse vleisbedryfsmaatskappy (Samic) geoudit, volgens ’n uitgebreide lys met 212 punte.
Vanjaar se wenner-slaghuise toon verskeie gemeenskaplike eienskappe, soos opleiding en opheffing van personeel, ’n passie vir besigheid, en verbruikersingesteldheid.
Kings Meat Deli Castle Walk in Erasmuskloof, Pretoria, het op nasionale vlak die platinum prys gekry vir slaghuise met vier en meer kasregisters en Impala Vleis in Brits die goue prys.
Franks Meat Mall in Middelburg, Mpumalanga, is met die platinum prys in die kategorie vir slaghuise met tot drie kasregisters vereer en West End-vleismark in Kimberley met die goue prys.
In die kategorie vir vleismarkte het Bluff Meat Supply in Beachweg, Durban, platinum verower en Saveway SuperSpar in eMalahleni (Witbank) goud.
Die provinsiale wenners is:
Gauteng
- Vier kasregisters en meer: Boma-vleismark in Moreletapark, Pretoria (platinum), Forsmay Moslem-slaghuis in Fordsburg (goud) en Meat World in Elarduspark, Pretoria (goud).
- Tot drie kasregisters: Delft-slaghuis en -deli, in Randpark Ridge, Randburg (platinum).
- Vleismarkte: Uitkyk-vleis-en-supermark in Silverton, Pretoria (platinum) en Pick n Pay Family Store in Brackenhurst (goud).
Noordwes
- Vier kasregisters of meer: Vision Meat in Klerksdorp (platinum).
Mpumalanga
- Tot drie kasregisters: Franks Meat in die sentrale sakekern van Middelburg (platinum).
- Vleismark: Komatipoort SuperSpar (platinum).
Vrystaat
- Vier kasregisters en meer: Fredilia Meat in Welkom (platinum).
- Tot drie kasregisters: Tevrede Vleismark in Memel (platinum).
Oos-Kaap
- Vier kasregisters en meer: Cuyler-slaghuis in Uitenhage (platinum).
- Vleismarkte: Levivale SuperSpar in Uitenhage (platinum), Swartkops Spar in Port Elizabeth (platinum) en Debi Lee SuperSpar in Oos-Londen (goud).
Wes-Kaap
- Tot drie kasregisters: Hartenbos-slaghuis (platinum) en Darling-vleismark (goud).
KwaZulu-Natal
- Vier kasregisters en meer: Michael Frey’s Fresh Meat in Margate (platinum), Bluff Meat Supply in Pietermaritzburg (goud).
- Vleismarkte: Bluff Meat Supply in Richardsbaai (platinum) en Bluff Meat Supply in Pinetown (goud).
Limpopo
- Vier kasregisters en meer: Vleislapa Marshallstraat in Polokwane (platinum).
