Twaalf perde het na bewering reeds in die Wes-Kaap gevrek ná ’n uitbreking van Afrika-perdesiekte. Luidens ’n berig in Volksblad (7 Maart) het dié diere sedert Donderdag (3 Maart) gevrek.
Die provinsie het reeds verlede week sy grense vir die vervoer van perde gesluit, en ’n verbod is Vrydag (4 Maart 2011) op die vervoer van perde na of van die Malmesbury-landdrosdistrik ingestel.
Die distrik is vir ’n radius van 10 km afgebaken. Dit het gevolg nadat twee perde in die distrik Mamre vermoedelik weens die siekte gevrek het.
Kwarantyngebied
Luidens die berig het ’n man Saterdag (5 Maart) van ’n plaas by Mamré na die Three Fountains-plaas naby Atlantis op sy perd gery en die 10 km-kwarantyngebied betree. Me. Marlese Groenewald, ’n perde-eienaar, sê die man het sowat 15 km ver na vriende gery.
Met sy aankoms by sy bestemming het hy gesien sy perd se kop is geswel en dit het glo gelyk of sy oë wou uitpeul. Dié perd het Sondagoggend (6 Maart) gevrek. Luidens ’n verklaring beweeg veeartse tans deur die afgebakende gebied om die omvang van die sielte te bepaal en diere in te ent.
Bron: Volksblad
7 Maart 2011
