Die internasionale landboumaatskappy Pioneer Hi-Bred gaan die Suid-Afrikaanse saadmaatskappy, Pannar Saad, vir ’n onbekende bedrag oorneem.
Die aankondiging oor die oorname is Woensdag (15 September) tergelykertyd in Des Moines, Iowa, in Amerika en in Johannesburg gedoen. Pioneer, wat deel is van die internasionale sakereus, DuPont, gaan ’n meerderheidsaandeel van 80% bekom, maar Pannar se bestuur, werknemers, geriewe en handelsmerke sal behou word.
Die transaksie is nog onderhewig aan die goedkeuring van die Suid-Afrikaanse Mededingingskommissie en ander regulatoriese vereistes en behoort vroeg aanstaande jaar afgehandel te wees.
Mnr. Paul Schickler, voorsitter van Pioneer, het tydens die aankondiging gesê die twee maatskappye saam kan ’n groter gebied dek, meer boere bereik en verbeterde saad vinniger beskikbaar stel as wat elkeen op sy eie sou kon doen.
Mnr. Brian Corbishley, voorsitter van Pannar, het ook die transaksie as goeie nuus vir boere, sy werknemers en vir Suid-Afrika bestempel. “Pioneer is die ideale vennoot vir groei oor die langtermyn. Hulle kan ons help om in ons kliënte se toenemende behoefte te voorsien na saad wat hoër opbrengste verseker.”
15 September 2010
