Veiligheid op plase word gedurende die feestyd selfs meer van ’n prioriteit aangesien plaasaanvalle en misdaad op plase gewoonlik dié tyd van die jaar toeneem, sê genl.maj. Chris van Zyl, adjunk-hoofbestuurder van TLU SA, luidens ’n verklaring.
Hy sê verskeie plaasaanvalle en -moorde is sedert November landwyd aangemeld en daar was reeds ’n duidelike toename. Een van die vernaamste redes vir die toename is die aanname dat boere groot hoeveelhede kontant by hulle het om onder meer lone te betaal.
“Kontant is beslis ’n groot probleem. Die gebruik van ’n digitale betaalstelsel is die oplossing, maar geografiese faktore, toegang tot winkels, hoe om daar uit te kom en die tyd wat dit in beslag neem, is van die vernaamste struikelblokke daarmee. Daar is 'n persepsie dat daar op elke plaas baie kontant, vuurwapens en verhandelbare goedere is.”
Hy versoek boere om nie kontanttransaksies vir vee aan te gaan nie. “Dan is daar ’n daling in waaksaamheid en paraatheid – dit is immers vakansietyd – en dan word slagoffers ontnugter en verras.”
Van Zyl moedig boere aan om by hul plaaslike veiligheidstrukture betrokke te raak. “Ek moet beklemtoon hoe belangrik betrokkenheid by jou onmiddellike omgewing is in dié tyd. Jy kan en mag nie in isolasie leef nie. Onthou, jou buurman is jou naaste bron van hulp.
“TLU SA is sterk voorstanders van die plaaswagstelsel waar vrywilligers saamspan om mekaar tot diens te wees. Landelike veiligheid werk op sy beste as daar samewerking tussen landbou-unies en die vernaamste belanghebbendes is. Dit is duidelik uit voorbeelde in Mpumalanga, Limpopo en Noordwes waar daar formele samewerkingsooreenkomste bestaan.
“Verskillende landbou-unies moet ’n gemeenskaplike standpunt inneem, want lewens en eiendom is op die spel. Ons kan nie daarna as net diefstal verwys nie. Ons mag nie diefstal onderskat nie.”
Hy sê dat TLU SA steun bied aan slagoffers van plaasaanvalle om hulle met hul herstel te help.
