Nadat daar jare lank nie ’n plaasmoord in die distrik was nie, is mnr. Jan de Kock (69) van die plaas Groot Waag by Petrus Steyn die naweek op sy plaas vermoor.
Volgens Volksblad het sy vrou, Marietjie (67), se noodkrete bure na die plaas ontbied waar hulle haar man aan die voorkant van die skuur gekry het. Hy was met binddraad aan sy vierwielmotorfiets vasgemaak.
De Kock is vermoedelik oorval toe hy gisteroggend na beeste in die spruit wou gaan soek, het Tom de Wet van Volksblad berig. Sy aanvallers is met hom terug na die plaashuis, waar sy vrou ook oorval en vasgebind is. Sy was nie beseer nie, net geweldig geskok.
Die egpaar se honde is sowat ’n week gelede tydens ’n inbraak op die plaas vergiftig. De Kock se Ford Ranger-dubbelkajuitbakkie is deur die polisie in Vereeniging opgespoor. Volgens die polisie was die inligting gistermiddag nog min. Daar was blykbaar drie aanvallers en die polisie was nog tot laat op die toneel besig. Benewens die voertuig is vuurwapens en selfone ook gesteel.
Bron: Volksblad.
