Boere, plaaswerkers en provinsiale regering hou môre-aand vanaand op Stellenbosch ‘n vergadering om “planne te beraam” om gewelddadige aanvalle op plase hok te slaan.
Dit volg nadat ‘n 44-jarige wynboer van Stellenbosch verlede week op sy plaas langs Kayamandi doodgeskiet is. “Die gemeenskap is geskok en emosioneel. ‘n Mens hoor altyd van hierdie dinge, maar dit is die eerste keer dat dit op jou voorstoep gebeur,” het mnr. Rudi Buys, voorsitter van die Stellenbosch-landbouvereniging, oor die moord op mnr. Alberto Costa van die plaas Cloetesdal gesê.
“Dit het in die middel van oestyd gebeur, en dit is nou almal se prioriteit om die Costas te help om hulle oes af te kry,” het Buys oor die gemeenskap se ondersteuning gesê. Costa was ‘n aktiewe lid van die landbouvereniging en ook baie betrokke by die gemeenskap.
Toename in geweld is kommerwekkend
Mnr. Bokkie Geyer, adjunk-hoofsweep van die DA, het die vergadering met boere belê. Mnr. Gerrit van Rensburg, Wes-Kaapse minister van landbou, en mnr. Albert Fritz, Wes-Kaapse minister van gemeenskapsveiligheid en sekuriteit, sal die vergadering in die Doornbosch-saal bywoon.
Stellenbosch se burgemeester is ook na die vergadering, wat na verwagting ‘n stampvol saal sal lok, genooi. Die vergadering begin om 19:00.
“Ek is net so bekommerd oor die toename van geweld, hetsy dit op plase of in woongebiede gebeur. Ek het dit goedgedink om die vergadering te reël sodat ons ‘n plan kan beraam om sulke voorvalle tot watter mate ookal te beperk. Dit kan beperk word deur optrede, soos beter patrollering of beter skakeling tussen mense, maar ook deur algemene wenke oor optrede tydens ‘n plaasaanval of –moord.”
Geyer sê alle mense wat op plase woon is sagte teikens.
Nie `n politieke saak
Oor mediagerugte dat mnr. Marius Fransman, nuutverkose Wes-Kaapse leier van die ANC en Suid-Afrika se adjunkminister van internasionale verhoudings, ook die vergadering gaan bywoon, het Geyer gesê: “Ek het hom nie genooi nie, maar dalk is dit ‘n goeie ding dat hy kom. Die polisie is ‘n afdeling wat onder die jurisdiksie van die nasionale Regering val, en nou kan boere kans kry om ‘n verteenwoordiger van nasionale Regering daaroor te vra.”
Buys het beklemtoon dat die landbouvereniging hul fasiliteite vir die vergadering beskikbaar gestel het, maar hulle sal nie toelaat dat dit in ‘n “politieke fiasko” ontaard nie.
23 Februarie
