Boere in die Karoo word gewaarsku om op die uitkyk te wees vir ‘n Franse egpaar wat ‘n beampte van die Suid-Afrikaanse Polisiediens (SAPD) op ‘n plaas naby Sutherland doodgeskiet het.
Mnr. Johan van Rensburg, uitvoerende hoof van Agri Noord-Kaap, sê verskeie waarskuwings is Vrydag (14 Januarie) uitgestuur nadat mnr. Philippe Pierre Meniere en me. Agnes Jeanne Jardel glo ‘n polisiebeampte doodgeskiet en ‘n ander ernstig gewond het.
“Mense word egter gewaarsku om nie die egpaar te konfronteer nie, maar om dadelik die SAPD te kontak”, sê Van Rensburg.
Die voorval
Volgens ‘n nuusbrief van eBlockwatch het die skietery gevolg ná vier beamptes die plaas, Hardie, saam met mnre. Jean en Cobus du Plessis, die eienaar se seuns, besoek het.
Die egpaar het die plaashuis glo vir 12 jaar kosteloos by die gesin gehuur, en hulle wou hê die Franse egpaar moes die huis ontruim aangesien die gesin weer die huis benodig het. Jardel was glo nie by die huis nie.
Net voor die groep die huis sou verlaat, het Meniere die 27-jarige offisier Jacob Boleme doodgeskiet. Die ander beamptes en die Du Plessis het te voet op die vlug geslaan, en die egpaar het hulle glo met ‘n voertuig agterna gesit en op hulle geskiet.
Die 42-jarige offisier Glenwall du Toit is in die rug geskiet. Hy is in ‘n ernstige toestand in ‘n plaaslike hospitaal. Hoewel die boere van die omgewing aanvanklik met die soektog gehelp het deur paaie af te sper, is sowat 50 beamptes na die omgewing ontplooi om na die egpaar soek.
Dokter en militant
Volgens die SAPD is die 60-jarige Meniere ‘n opgeleide mediese dokter wat militêre opleiding in Frankryk ontvang het. Hy en die 55-jarige Jardel het vermoedelik vyf wapens in hulle besit, en is baie fiks aangesien hulle gereeld staptogte in die omgewing onderneem het en “elke bossie” op die plaas ken.
Die SAPD vermoed dat hulle nie ver gevlug het nie en moontlik die SAPD se elke beweging vanuit hulle skuilplek dophou. Albei het Suid-Afrikaanse burgerskap - hoewel hulle oorspronklik van Frankryk kom.
Enigiemand met inligting word gevra om die SAPD op 023 571 8040 te kontak.
18 Januarie 2011
