Mnr. Jason Winrow (47) van Bluewater by Oos-Londen is Saterdagoggend omstreeks 06:40 met ’n skietwond dood by die ingang van sy plaas aangetref. Volgens mnr. Greg Miles van die plaas Bare Acres by Stutterheim is Winrow geskiet toe hy Vrydagaand op sy plaas aangekom en uit sy bakkie geklim het om 'n hek, wat met ’n draad toegedraai was, los te maak.
Die verdagtes het hom geskiet en met sy bakkie ontvlug. Sy voertuig is nog nie gevind nie. Winrow, wat met hoenders geboer het, word deur ’n seun van 10 jaar oorleef.
In ’n ander voorval, is mnr. Robbie Blaine (60) van Wauldby, Stutterheim erg getraumatiseer toe hy Saterdagoggend omstreeks 05:30 deur drie aanvallers verras is. Volgens sy vrou, Peta, wat nie ten tye van die voorval op die plaas was nie, het Blaine sy honde op die werf hoor blaf.
“Toe hy uitgegaan het om vas te stel wat die probleem was, het drie jong mans, wat ongewapen was, hom in die huis ingedwing waar ’n worsteling ontstaan het.
“Robbie kon egter daarin slaag om alarm te maak. Van die bure het binne 10 minute op die plaas aangekom, maar die aanvallers het hulle reeds uit die voete gemaak. ’n Sak met elektroniese toerusting wat hulle buitgemaak het, is later in die veld opgetel,” het sy aan Landbou.com gesê.
Nóg voorvalle
In ’n derde voorval is ’n bejaarde boer, mnr. Basil Peinke (72) van Stutterheim ook ernstig in ’n plaasaanval die naweek beseer.
Volgens mnr. Danie von Lutsenborg, voorsitter van Agri Oos-Kaap se veiligheidskomitee was daar ook verlede week ’n vierde voorval op ’n kleinhoewe by Kids Beach by Oos-Londen. Die eienaar van die kleinhoewe is ook ernstig beseer.
“Agri Oos-Kaap neem met kommer kennis van die aanvalle en die kwessie van landelike sal op ons jaarkongres wat Donderdag op Port Alfred gehou word, bespreek word. Ons is nietemin bly oor die SADP se samewerking om die verdagtes wat nog almal op vrye voet is te probeer opspoor,” het Von Lutsenborg gesê.
