Hoewel dit nie onweerlegbaar bewys kan word nie, blyk dit uit ’n studie deur AfriForum dat haatspraak en opruiende politieke uitsprake jeens boere gepaardgaan met ’n toename in plaasmoorde.
AfriForum het vyf bekende gevalle waar haat en geweld deur politieke leiers teen wit boere aangehits is, ondersoek. Sy studie toon dat plaasmoorde in die daaropvolgende maande met gemiddeld 74,8% toegeneem het.
“Ons kan nie empiries bewys dat die politieke uitsprake tot die plaasmoorde gelei het nie, maar wat ons wel sien, is ’n styging in moorde,” sê mnr. Ernst Roets, adjunk-uitvoerende hoof.
Die vyf gevalle
* Ná mnr. Peter Mokaba, destydse voorsitter van die ANCJeugliga, se sing van “Kill the Boer, kill the farmer” in 1993 het plaasmoorde met 135% toegeneem.
* Ná mnr. Julius Malema, toe voorsitter van die ANCJeugliga, se sing van “Shoot the Boer” in 2010 was die toename 51%.
* Ná mnr. Ronald Lamola, adjunkpresident van die ANC Jeugliga, se oorlogspraatjies in 2012 het plaasmoorde met 60% gestyg.
* Met pres. Jacob Zuma se sing van “Shoot the Boer” in 2012 was die styging 36%.
* Ná Malema, nou EFF-leier, se toesprake oor die slagting van wit mense in November 2016 was die styging 92%.
Plaasmoorde is ’n ingewikkelde verskynsel en daar is ’n wye verskeidenheid dinge wat daartoe kan bydra. Haatspraak is een daarvan.
'Politici is aandadig'
“Politici moet besef dat hulle aandadig is en moet daarvoor verantwoordelik gehou word. Ons wil met die verslag hulle tot verantwoording roep.” Roets sê dit is ook belangrik dat haatspraak gehanteer word binne die gemeenskap wat hom daaraan skuldig maak. Die ANC moet self daarteen standpunt inneem.
Oor die motief vir plaasmoorde sê hy die meeste mense aanvaar nog goedsmoeds die bevindinge van ’n ondersoek in 2003 waarin bevind is dat 98,3% van aanvalle net op roof gemik was en net in 2% gevalle was dit deur politiek of rassehaat gemotiveer. Hy sê die ondersoek, gegrond op onderhoude met misdadigers, kan om baie redes bevraagteken word.
“Die Regering, wat die ondersoek gedoen het, het onder meer sy eie, gevestigde belang daarby gehad. Daar is net een rede vir ’n aanval aanvaar en die misdadigers kon oneerlik gewees het. Die geweld en marteling wat met baie aanvalle voorkom, is ook nie in ag geneem nie.”
