Groot ontevredenheid heers onder plaaswerkers nadat me. Mildred Oliphant, Minister van Arbeid, haar besoek aan plase in die Paarl-omgewing uitgestel het.
Die Wes-Kaapse plaaswerkersorganisasie Sikhule Sonke het sy ontevredenheid hiermee te kenne gegee en hoop glo om uitgawes wat reeds aangegaan is om plaaswerkers van die imbizo bewus te maak, terug te eis.
Oliphant sou op 17 Maart 50 plase in die Paarl-omgewing besoek. Daar was glo klagte oor al die plase en sy wou self die situasie betrag. Op 18 Maart sou sy ’n imbizo met sowat 2 000 mense – hoofsaaklik plaaswerkers – by die Mbekweni-stadion in die Paarl bywoon.
Die besoek is egter tot 30 en 31 Maart uitgestel omdat Oliphant “as ’n saak van dringendheid” met pres. Jacob Zuma, op die oorspronklike datum moes vergader.
Ontstellend
“Die nuus is vir ons ongelooflik ontstellend, want ons moes, soos baie ander organisasies en rolspelers, moeite doen om ons plaaswerkers te organiseer om die dag by te woon.
"Dit sal moeilik wees om ons kapasiteit vir die tweede datum te herorganiseer, want dan het ons twee ander plaaswerkerveldtogte in Barrydale en Rawsonville,” het me. Henriette Abrahams, programbestuurder van Sikhule Sonke, in ’n e-pos geskryf.
“Op dieselfde noot wil ek vra oor die vergoeding vir uitgawes wat reeds aangegaan is vir die plaaslike organisering en om bewusmaking onder ons lede in die burgerlike samelewing en vakunie-organisasies te doen.”
19 Maart 2012
