Landbou-organisasies se plan om ’n gesamentlike spreekbuis vir die sektor te bewerkstellig, vorder fluks.
’n Taakspan het sy konsep-verwysingsraamwerk opgestel. Dié raamwerk sal dien as grondslag waarop die spreekbuis sal funksioneer indien dit deur belanghebbendes in die landbou aanvaar word.
Dít volg op ’n besluit wat in November geneem is om ’n verenigde stem aan die landbou te verleen. Na verwagting sal landbouleiers vanuit alle oorde by dié nasionale forum kan aansluit sodat die sektor uit een stem kan praat oor deurslaggewende kwessies wat ’n invloed op alle betrokkenes binne die landbou het.
Dr. John Purchase, voorsitter van die taakspan, is optimisties oor die raamwerk. Hy sê dié planne sal waarskynlik in Februarie aan die belangrikste besluitnemers in die georganiseerde landbou voorgelê word. Purchase is die uitvoerende hoof van die Landboubesigheidskamer.
Daar word verwag dat dié spreekbuis uiteindelik ’n einde sal bring van die versnipperde gesprekvoering wat daar tans tussen die staat en landbouverteenwoordigers bestaan.
20 Desember 2011
